ད་དེ་ལ་རྡོར་སེམས་སྒོམ་བཟླས་དང་བླ་མའི་རྣལ་འབྱོར་འབྲེལ་ནས་གསུང་ཡོད་རེད། རང་གི་སྤྱི་བོའི་སྟེང་དུ་ཟླ་བའི་དཀྱིལ་འཁོར་གཅིག་བསྒོམ། དེའི་སྟེང་དུ་ཧཱུྃ་དཀར་པོ་ཞིག་བསམ་དེ་ཡོངས་སུ་གྱུར་པ་ལས། དཔལ་རྡོ་རྗེ་སེམས་དཔའ་སྐུ་མདོག་དཀར་ལ་དམར་བའི་མདངས་དང་ལྡན་པ། ཞལ་གཅིག་ཕྱག་གཉིས་པ། ཕྱག་གཡས་རྡོ་རྗེ་ཐུགས་ཀར་བསྣམས་པ། གཡོན་དྲིལ་བུ་དཀུ་ལ་བརྟེན་པ། དུས་རྒྱུན་ལྟར་བསྒོམ། བ་ཏིའི་ཤམ་ཐབས་ཅན། བ་ཏའི་ལབ་དུས་ལྷའི་གོས་ལྷ་ཡི་ལུང་པ་ལ་ཡོད་པའི་གོས་སོ་སོ་སྐྱེ་བོའི་སྤྱོད་ཡུལ་ལས་འདས་པ་ཁྱད་པར་འཕགས་པ་ཞིག་ལ་གོ་དགོས་ཡོད་ས་རེད། སྐུ་སྨད་ལ་ཤམ་ཐབས་གསོལ་བ། སྐུ་ལ་རིན་པོ་ཆེའི་དབུ་རྒྱན་དང་མགུལ་རྒྱན་ལ་སོགས་པ་སྣ་ཚོགས་ཀྱིས་བརྒྱན་པ་ཞིག་གསལ་བར་བསྒོམ། དེ་ལྟར་དུ་བསྒོམས་པའི་ཐུགས་ཀར་ཟླ་བའི་སྟེང་དུ་ཧཱུྃ་ཡིག་མཐར་ཡི་གེ་བརྒྱ་པའི་བསྔགས་ཀྱིས་སྐོར་བ་དེ་ལས་བདུད་རྩིས་དཀར་པོའི་རྒྱུན་བྱུང་སྟེ་རྡོ་རྗེ་སེམས་དཔའི་སྐུའི་མཐེ་བོང་ནས་མར་བབས་རང་གི་ཚངས་པའི་བུ་ག་ནས་ཡེ་ཤེས་ཀྱི་བདུད་རྩིའི་ཆུ་རྒྱུན་བྱུང་སྟེ་ལུས་ཐམས་ཅད་གང་། སྤྱི་བོ་ཚངས་པའི་བུ་ག་ནས་མར་བྱུང་བས་རང་གི་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་དག་པར་བསྒོམ་ཞིང༌། དེ་ལྟར་བསྒོམ་ནས། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ། ཏིཥྛ་དྲྀ་ཌྷྲོ་མེ་བྷ་ཝ། སུ་པོ་ཥྱོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུྃ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ་ཧྲི་ད་ཡ། བཛྲ་མཱ་མེ་མུཉྩ། བཛྲཱི་བྷ་བ། མ་ཧཱ་ས་མ་ཡ། ས་ཏྭ་ཨཱཿ ཡི་གེ་བརྒྱ་པ་གྲངས་གང་ཐུབ་གསོག ད་ང་ཚོ་སྤྱིར་གསང་སྔགས་ཀྱི་ཆོས་ཉམས་སུ་ལེན་མཁན་ཞིག་ལ་མཚོན་ན་རྡོར་སེམས་བཟླས་པ་ཉིན་རེ་མ་ཆགས་པར་ཉམས་སུ་ལེན་དགོས་པ་རེད། ད་རྡོ་རྗེ་སེམས་དཔའ་རང་ཉིད་ལ་ཐིམས་ནས་རང་དང་རྡོ་རྗེ་སེམས་དཔའ་དབྱེར་མེད་པར་བསྒོམ། འདི་བླ་མའི་རྣལ་འབྱོར་དང་ཡི་གེ་བརྒྱ་པ་ལ་བརྟེན་ནས་སྒྲིབ་པ་སྦྱོང་བ་དེ་ཡིན། བླ་མའི་རྣལ་འབྱོར་དང་གཅིག་པ་ཡིན། ད་མཎྜལ་ལ་བརྟེན་ནས་ཚོགས་གསོག་པའི་མན་ངག་ཉམས་སུ་བླང་བ་ནི། རང་གི་མདུན་དུ་མཎྜལ་གཅིག་བཞག་ནས་ལུས་ངག་ཡིད་གསུམ་གྱི་སྡིག་སྒྲིབ་དག་པར་བསམ་ཞིང་ཡི་གེ་བརྒྱ་པ་ཚར་གཅིག་བརྗོད། གཟུང་བ་དང་འཛིན་པའི་མ་དག་པའི་སེམས་ལ་མ་ཡིན་པར་དག་པ་གནས་ལུགས་ཀྱི་སེམས་ལ་བཞག་ནས། མཎྜལ་དེའི་དཀྱིལ་དུ་འབྲུ་སམ་རིན་པོ་ཆེ་ལ་སོགས་པའི་ཚོམ་བུ་གཅིག་བཞག་ནས། ཚོམ་བུ་དེ་ཉིད་གདན་སེང་གེ་བརྒྱད་ཁ་ཕྱིར་བསྟན་པའི་སྟེང་དུ་པདྨ་དང་ཉི་མ་ཟླ་བ་དེའི་སྟེང་དུ་བླ་མ་རིན་པོ་ཆེ་ཀརྨ་པ་བཞུགས་པ་ཞིག་བསྒོམ། དེ་ལ་མཆོད་པ་ཕུལ་བར་བསམ་ནས་ཨརྒྷཾ་ཨཱཿཧཱུྃ་ལ་སོགས་ཚར་གཅིག་བརྗོད། དེའི་མདུན་དུ་ཡང་ཚོམ་བུ་གཅིག་བཀོད་ལ། རྗེ་བཙུན་རྡོ་རྗེ་རྣལ་འབྱོར་མ་རྡོ་རྗེ་འཕགས་མོ་ལ་གསང་སྔགས་ཀྱི་ཡི་དམ་གྱི་ལྷ་ཐམས་ཅད་ཀྱི་སྐོར་ནས་བཞུགས་པར་བསམས་ནས་དེ་ལ་ཡང་མཆོད་པ་གཅིག་ཕུལ། དེ་ནས་གཡས་ཕྱོགས་སུ་ཚོམ་བུ་གཅིག་བཀོད་ནས། སྤྲུལ་སྐུ་ཤཱཀྱ་ཐུབ་པས་གཙོར་བྱས་པའི་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པ་བཞུགས་པར་བསྒོམས་ལ། དེ་ལ་མཆོད་པ་གཅིག་འབུལ། དེའི་རྒྱབ་ཀྱི་ཕྱོགས་སུ་ཡང་ཚོམ་བུ་གཅིག་བཀོད་ལ། ཐེག་པ་ཆེན་པོའི་ཆོས་ཐམས་ཅད་པོ་སྟི་རྣམ་པར་བརྩེགས་ནས་བཞུགས་པར་བསྒོམ། དེའི་གཡོན་དུ་ཚོམ་བུ་གཅིག་བཀོད་ནས་སྤྱན་རས་གཟིགས་ལ་སོགས་པའི་བྱང་ཆུབ་སེམས་དཔའི་དགེ་འདུན་དང་ཉན་ཐོས་ཀྱི་དགེ་འདུན་དགྲ་བཅོམ་པ་དཔག་ཏུ་མེད་པས་སྐོར་བར་བསམ། རང་གི་ལུས་འདི་ཡང་མཆོད་པ་འབུལ་རང་ལ་འབྱོར་བ་ག་ཚོད་ཡོད་པ་དེ་ཡང་མཆོད་པ་ཕུལ་བར་བསམ་ནས་མཎྡལ་ཕུལ། རང་གི་སེམས་གང་ལ་ཡང་མ་འགྲོ་བར་སེམས་ཀྱི་གནས་ལུགས་ཀྱི་སྟེང་ལ་བཞག སྒྲ་སྒྲགས་ཐམས་ཅད་གྲགས་པ་དང་སྟོང་པ་དབྱེར་མེད་པ། གཟུང་སྣང་ཐམས་ཅད་གཟུགས་དང་སྟོང་པ་དབྱེར་མེད་པ། གནས་ལུགས་ཀྱི་ངང་དུ་བཞག སེམས་ཀྱི་ངོ་བོ་གསལ་སྟོང་གསལ་ལ་སྟོང་པ་འཛིན་པ་མེད་པ་སྟོང་པ་ཆོས་ཀྱི་སྐུ། སེམས་ཅན་ཐམས་ཅད་ཀྱི་སེམས་ཀྱི་རང་བཞིན་ཆོས་ཀྱི་སྐུ་རེད། དེའི་ངང་ལ་མཉམ་པར་བཞག །དེ་ནི་མཎྜལ་དང༌། གསལ་སྟོང་འཛིན་མེད་ལ་བརྟེན་ཏེ་ཚོགས་བསགས་པའི་གདམ་ངག་གོ །དེའི་ནང་དུ་སྔོན་དུ་འགྲོ་བའི་ཆོས་བཞིའི་མན་ངག་ཚང་སོང་བ་རེད།
ད་དངོས་གཞི་གནད་བཞིའི་མན་ངག་ཁྱད་པར་དུ་འཕགས་པ་སྟོན་ཏེ། གནད་འགག་ཆུང་ཆུང་ཞིག་ཉམས་སུ་ལེན་པ་ལ་བརྟེན་ནས་ཆོས་ཐམས་ཅད་ཀྱི་གནད་འགག་ཐམས་ཅད་ཉམས་སུ་ལེན་པ་དང་ཁྱད་མེད་པ་ལྟ་བུ། གནད་གཅིག་གི་ནང་དུ་གནད་མང་པོ་ཚང་སྡོད་པ་ལྟ་བུ། དེའི་ནང་ནས་དངོས་གཞི་ལུས་ཀྱི་གནད་གལ་ཆེ་སྟེ། ལུས་ཀྱི་གནད་འདི་དཔེ་མི་སྲིད་པ་གལ་ཆེན་པོ་ཡིན། ལུས་ཀྱི་གནས་ཐབས་སྒོམ་པའི་གནད་ཅེས་པས་སྒོམ་རྒྱབ་པའི་གནད་ཡང་དེར་ཚང་ཡོད། ལུས་ཀྱི་གནས་ཐབས་འདི་དཔེ་གལ་ཆེན་པོ་རེད། སྔར་གྱི་ལོ་རྒྱུས་ནང་ལ་སྒྲ་སྒྱུར་མར་པ་ལོ་ཙཱ་བ་ལུས་གནད་སྲང་ནས་བཞུགས་སྡོད་པའི་སྐབས་སུ་ཡང་། སྒྲ་སྒྱུར་མར་པ་ལོ་ཙཱ་བའི་སྐུའི་བཞུགས་སྟངས་མཐོང་བ་ཙམ་གྱིས་ཞལ་ནས་ཆོས་གསུང་མ་དགོས་པར་སེམས་ཀྱི་གནས་ལུགས་རྟོགས་པ་ཁ་ཤས་བྱུང་ཡོད་རེད། ལུས་བཏང་སྙོམས་རྩོལ་སྒྲུབ་མེད་པ་སྐྱིལ་ཀྲུང་བཅའ། ངག་མ་བཅོས་པ་རང་སར་བཞག །ངག་མ་དག་པའི་གཏམ་འདྲ་བོ་མ་བཅོས་པ་རང་སར་བཞག །ངག་གི་དུས་རྒྱུན་མ་དག་པའི་གཏམ་སྐད་ཆ་མང་པོ་བཤད་སྐབས་སུ་ལུས་ཀྱི་རླུང་ཐམས་ཅད་འཁྲུགས་ནས་ཏིང་ངེ་འཛིན་ཡང་རྒྱུད་ལ་མི་སྐྱེས་དགེ་བའི་བློ་ཡང་རྒྱུད་ལ་མི་སྐྱེས་ཉོན་མོངས་པ་ཐམས་ཅད་ཡར་འཕེལ་བ་ལ་སོགས་པ་སྐྱོན་མང་པོ་ཡོད། ད་ཉམས་ལེན་གནང་མཁན་ཚོས་ངག་གི་སྐད་ཆ་རྩ་ནས་མི་བཤད། འདོན་པ་འདོན་སྐབས་སྐད་ཆ་ཐམས་ཅད་ཕར་སྤང་ནས་ཟླ་བ་རེ་གཉིས་ཙམ་ཁ་བཅད་ནས་སྡོད་གལ་སྲིད་སྐད་ཆ་བཤད་དགོས་ན་ཡང་ཡི་གེ་འབྲི་ནས་བཏོན་པ་དེ་འདྲ་གནང་བའི་ལུགས་སྲོལ་ཡོད་པ་རེད། དེ་ནས་ཚོགས་དྲུག་མིག་སྣ་རྣ་ལྕེ་ལུས་ཡིད་ཀྱི་རྣམ་ཤེས་ཚོགས་དྲུག་ཡུལ་སོ་སོ་སོ་སོ་ལ་འཇུག་པའི་འཇུག་ཤེས་དྲུག་གི་སྣང་བ་དགག་པ་ཡང་མེད། སོར་ཆུད་པ་ཡང་མ་གྲུབ་པར་རང་བབས་གནས་སུ་བཞག་ནས་སེམས་ཀྱི་ཆོས་ཀྱི་དབྱིངས་ལ་མཉམ་པར་བཞག་ན་མིག་དང་སྣ་རྣ་ལྕེ་ལ་སོགས་པ་རང་བཞིན་གྱི་ཆོས་ཀྱི་དབྱིངས་ཀྱི་གནས་ལུགས་ལ་གནས་འགྲོ་གི་ཡོད་རེད། དེའི་ངང་ལ་མཉམ་པར་བཞག ཡུན་རིང་དུ་གནས་པ་དང་རང་གྲོལ་དུས་གནས་ནས་དེ་ཡིན་ན་གང་ཟག་གི་ཁྱད་པར་གྱི་ཁ་ཤས་ཡུན་རིང་པོ་གནས་ཐུབ་ན་ཡག་པོ་ཡོད་རེད། ཁ་ཤས་ཡུན་རིང་པོ་གནས་ཙམ་མ་ཟད་རང་སར་གྲོལ་ནས་འགྲོ་བ། སྒོམ་ཉམས་ལེན་ཡག་པོ་ཡོད་ན་ཚོགས་དྲུག་གི་ཤེས་པ་ཐམས་ཅད་གནས་ལུགས་ཀྱི་ངང་དུ་གྲོལ་འགྲོ་བ་སྒྲིབ་པ་ཐམས་ཅད་གྲོལ་འགྲོ་བ་གནས་པ་ནི་ལུས་ཀྱི་གནད་ཡིན་ཏེ།
ད་འདི་ནས་དུས་རྒྱུན་ང་རང་ཚོས་བཤད་སྡོད་ཡ་རྣམ་སྣང་ཆོས་བདུན་འདི་རེད་དེ་གསུང་སྟངས་མ་འདྲ་བ་ཞིག་གསུངས་འདུག རིན་པོ་ཆེ་ཀརྨ་པའི་ཞལ་ནས་འབྱུང་བཞི་ལུས་ཀྱི་འདུག་ཚུལ་ནི། བདེ་དང་ཡང་དང་ལྷོད་དང་གསུམ། །ཞེས་ལུས་ཀྱི་འཇོག་ཚུལ་ནི་བདེ་བོ་བྱེད་ནས་སྡོད་པ། མ་བདེ་བ་དེ་འདྲ་ཡིན་ན་སྒོམ་ཡག་པོ་སྐྱེས་ཀྱི་མ་རེད། རང་གང་བདེ་བ་དེ་བྱེད་དགོས་རེད། ཡང་པ་ནི་དཔུང་པ་རྒོད་གཤོག་ལྟར་ཡང་པ་མགྲིན་པ་ཅུང་འགུགཔ་ལ་སོགས་པ་དང་སྐྱིལ་ཀྲུང་བཟོ་ནས་བཅུམ་བཅུམ་བྱེད་ནས་སྡོད་པ་མ་ཡིན་པར་ཡང་པོ་བྱས་ནས་སྡོད་པ། ལྷོད་པ་ནི་དཀའ་ལས་ཆེན་པོ་བརྒྱབ་ནས་སྡོད་སྡོད་ན་སེམས་ཏིང་ངེ་འཛིན་སྒོམ་ཐུབ་ཀྱི་མ་རེད་དཀའ་ལས་ཆེན་པོ་རེད་མ་སོང་བ་ངལ་གསོ་གིན་གསོ་གིན་བྱེད་ན་ལྷོད་པོ་བྱེད་གསུངས་པ་རེད། ལག་པ་ས་གནོན་གྱི་ཕྱག་རྒྱ་བཅས་ནས། ཞེས་པ་ལག་པ་པུས་མོ་གཉིས་ལ་མར་བཞག་ནས། སེམས་སེམས་ཉིད་ཀྱི་གཤིས། ཞེས་པ་སེམས་རང་གི་གནས་ལུགས་ངང་ལ་བཞག ཡུལ་གཟུགས་སྒྲ་དྲི་རོ་རེག་བྱ་ལ་སོགས་པ་རྣམས་ཀྱང་ཆོས་ཀྱི་དབྱིངས་སུ་མཉམ་པར་བཞག་པ་མ་གཏོགས་གཟུགས་མཛེས་པ་དེ་འདྲ་ལ་ཡག་པོ་རེད་ལབ་ནས་ཞེན་པ་དང་། སྡུག་པ་ལ་སྡུག་པ་འདུག་ལབ་ནས་གཡུག་བཞག་པ་དེ་འདྲ། སྒྲ་སྙན་པ་ལ་དགའ་མི་སྙན་པ་ལ་མི་དགའ་བ་དེ་འདྲ་མ་ཡིན་པ་ཡག་ཉེས་གང་ལ་ཡང་ཞེན་པ་དང་ཆགས་པ་མེད་པ་གནས་ལུགས་ལ་ཁྱད་པར་མེད་པ་གཅིག་པ་ཡིན་པ། དེའི་དབྱིངས་སུ་རང་བབས་སུ་མཉམ་པར་བཞག
ད་འདི་ནས་བླ་མའི་རྣལ་འབྱོར་བསྒོམ་པ་མོས་གུས་ཀྱི་གནད་སྟོན་པ་རེད། དད་པ་དང་མོས་གུས་རྒྱ་ཆེན་པོ་ཤུགས་ཆེན་པོ་དགོས་ཀྱིས་རེད། སངས་རྒྱས་བཅོམ་ལྡན་འདས་ཀྱིས་ཆོས་གསུང་བའི་སྐབས་སུ་ཡང་། དད་པ་ནི་ཆོས་རྣམས་ཀྱི་སྒོ། བསམ་པ་མི་ཤེས་པས་སོ། དགེ་བའི་བློ་ག་ཚོད་སྐྱེས་པ་དེའི་རྗེས་སུ་ཤུགས་ལ་སླེབས་ཡོང་གི་རེད། དད་པའི་སྒོ་ནས་རང་གི་སྤྱི་བོའི་སྟེང་དུ་པདྨ་དང་ཉི་མ་ཟླ་བའི་གདན་གྱི་སྟེང་དུ། རྩ་བའི་བླ་མ་ཀརྨ་པ་དང་ཐ་མི་དད་པ་དཔལ་རྡོ་རྗེ་འཆང་སྐུ་མདོག་ཤིན་ཏུ་སྔོན་པོ། ཞལ་གཅིག་ཕྱག་གཉིས་པ། ཞབས་སྐྱིལ་མོ་ཀྲུང་དུ་བཞུགས་པ། ཕྱག་ས་གནོན་གྱི་ཕྱག་རྒྱ་མཛད་ཅིང་སྐུ་ལ་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། དེ་ལྟ་བུ་བསྒོམ་པར་གསུངས་ཏེ། རྒྱུད་ལས། བླ་མ་དཔལ་ལྡན་རྡོ་རྗེ་འཆང༌། །ཞེས་གསུངས་པས་རྡོ་རྗེ་འཆང་དང་བླ་མ་གཉིས་གདོད་མ་ནས་གོང་དུ་བཤད་པ་ལྟར་ཐ་མི་དད་པ་ལ་ཐ་དད་དུ་དབྱེར་མི་རུང་བར་བཞུགས་པར་བསྒོམས། དེ་ལྟར་བཞུགས་པ་དེ་ཉིད་ལ་བཀའ་བརྒྱུད་ཀྱི་བླ་མ་གྲུབ་ཐོབ་ཐམས་ཅད་ཀྱིས་བསྐོར་ནས་ཁྱད་པར་སྐུ་གསུམ་ངོ་སྤྲོད་དེའི་བརྒྱུད་པའི་བླ་མ་ཐམས་ཅད་ཀྱིས་བསྐོར་ནས་བཞུགས་པར་བསྒོམ་ཞིང༌། དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་བསམ་གྱིས་མི་ཁྱབ་པའི་ངོ་བོ་དཔལ་རྡོ་རྗེ་འཆང་བཀའ་བརྒྱུད་ཀྱི་བླ་མའི་ཚོགས་ཀྱིས་བསྐོར་བ་རྣམས་ལ་སྐྱབས་སུ་མཆིའོ། །བདག་གི་ལུས་ངག་ཡིད་གསུམ་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་མཛད་དུ་གསོལ། དེ་ལན་གྲངས་མང་པོ་གསོག་ནས་གསོལ་བ་གདབ། ཞེས་གསོལ་བ་བཏབ་པས་བཀའ་བརྒྱུད་བླ་མ་ཐམས་ཅད་དཔལ་རྡོ་རྗེ་འཆང་ལ་ཐིམས། རྡོ་རྗེ་འཆང་ཉིད་འོད་དུ་ཞུ་ནས་བདག་གི་སྤྱི་བོ་ཚངས་པའི་བུ་ག་ནས་མར་བྱུང་བས། སྐུ་གསུང་ཐུགས་ཀྱི་བྱིན་རླབས་ཐམས་ཅད་རང་ཉིད་ལ་ཐོབ་པར་བསམ་དགོས་རེད། བདེན་པའི་གནས་ལུགས་ལ་བརྟེན་ནས་རང་ཉིད་དང་བླ་མ་དབྱེར་མེད་པར་བསྒོམ་བཞག་ན་མཐར་ཐུགས་བླ་མ་དང་དབྱེར་མེད་པ་རེད་ཡོད་རེད། བླ་མ་རང་ཉིད་ལ་ཐིམ་པར་བསྒོམ་ཡ་འདི་གནས་ལུགས་ཀྱི་དོན་ལ་སངས་རྒྱས་དང་སེམས་ཅན་གཉིས་ཀྱི་བདེ་བཞིན་ཉིད་ལ་དབྱེར་མེད་པ་རེད། བདེན་པའི་གནས་ལུགས་དེ་འདྲ་ཡིན་དུས་དེ་བསྒོམ་བཞག་ན་བདེན་པའི་གནས་ལུགས་མངོན་དུ་འགྱུར་ཡོང་གི་རེད། དུས་རྟགས་ཏུ་དེ་འདྲ་བསྒོམ་དགོས་རེད། དེ་ཡང་ཀྱེའི་རྡོ་རྗེའི་རྒྱུད་ལས། །གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟེན་པ་དང༌། །བདག་གི་བསོད་ནམས་ལས་ཤེས་བྱ། །ཅེས་གསུངས་པ་ལྟར་དུ། བླ་མའི་བྱིན་རླབས་སྙིང་ལ་བཞུགས་པ་དེའི་རྒྱུ་རྐྱེན་འཛོམས་པ་ལ་བརྟེན་ནས་རྟོགས་དགོས་པ་རེད། དེ་ཡང་བླ་མ་མིའི་གཟུགས་སུ་མི་སྒོམ། བླ་མ་དཔལ་ལྡན་རྡོ་རྗེ་འཆང་དུ་བསྒོམ་པ་དེ་རེད། ནཱ་རོ་པའི་ཞལ་ནས། ཡོན་ཏན་ཀུན་གྱི་གཏེར་མཛོད་བླ་མ་སྟེ། །ཆོས་རྣམས་ཀུན་གྱི་རྩ་བ་བླ་མ་ཡིན། །ཞེས་པའི་ཕྱིར་ན་རྩ་བ་དང་བརྒྱུད་པའི་བླ་མ་ཐམས་ཅད་ཀྱི་ངོ་བོ་དཔལ་རྡོ་རྗེ་འཆང་དུ་བསྒོམ་པ་ནི། བླ་མའི་རྣལ་འབྱོར་བསྒོམ་པ་མོས་གུས་ཀྱི་གནད་དོ། །
ད་ནི་རླུང་གི་གནད་སྟོན་ཏེ། རླུང་དེ་ལ་ཡང་དག་པའི་རླུང་དང་མ་དག་པའི་རླུང་གཉིས། མ་དག་པའི་རླུང་ནི་སེམས་ཅན་རྣམས་ཀྱིས་ལས་བསགས་པ་ལ་བརྟེན་ནས་བྱུང་བ་རེད། མ་དག་པའི་རླུང་གིས་སེམས་ཀྱི་ཉོན་མོངས་པ་ཐམས་ཅད་སྐྱེས་ཡོང་བ་རེད། མ་དག་པའི་འཁྲུལ་པའི་སྣང་བ་ཐམས་ཅད་ཀྱང་སྐྱེས་ཡོང་བ་རེད། འཁོར་བའི་སྡུག་བསྔལ་ཐམས་ཅད་ཀྱང་རླུང་གིས་བཟོས་ཀྱི་ཡོད་རེད། ད་དག་པའི་རླུང་འདི་གནས་ལུགས་ཀྱི་དོན་སེམས་ཀྱི་གནས་ལུགས་སམ་ཆོས་ཀྱི་དབྱིངས་བདེ་གཤེགས་སྙིང་པོ་རང་བྱུང་གི་ཡེ་ཤེས་ལབ་ན་ཡང་དེ་ཡིན། དེའི་རང་བཞིན་ལབ་ཡང་དེའི་བྱེད་ལས་ལ་རླུང་གཅིག་ཡོད་རེད་དེ་རེད། རླུང་དེའི་བྱེད་ལས་ཀྱིས་མ་དག་པའི་རླུང་ཐམས་ཅད་མེད་པར་བཟོས་ཀྱི་ཡོད། མ་དག་པའི་སྡུག་བསྔལ་དང་འཁོར་བའི་རྣམ་པར་རྟོག་པའི་སྣང་བ་ཐམས་ཅད་ཀྱང་མེད་པར་བཟོ་ཡི་ཡོད་རེད། དེ་ནས་དག་པ་སྐུ་བཞི་དང་སྐུ་གསུམ་ཡེ་ཤེས་ལྔ་ལ་སོགས་པ་ཐམས་ཅད་ཀྱང་ཡེ་ཤེས་ཀྱི་རླུང་གིས་ཐོབ་པར་བྱེད་ཀྱི་ཡོད་རེད། དེ་ལྟ་བུའི་རླུང་དེ་རྫོགས་པའི་སངས་རྒྱས་ཀྱིས་གསང་སྔགས་ཀྱི་རྒྱུད་སྡེ་ཁག་ནང་ལ་གསུངས་ཡོད་རེད། ཐུན་མོང་མདོའི་ནང་ལ་རླུང་དེ་གསལ་པོར་གསུང་ཡོད་མ་རེད། རྩ་བ་རླུང་དེ་གསུང་ཡོད་མ་རེད། ད་ང་ཚོས་ལུས་གནད་སྡོད་ཐང་འདི་ཚོ་ལ་བརྟེན་ནས་རླུང་བསྒོམ་ནས་མ་དག་པའི་རླུང་ཕར་སྦྱང་། དེ་ཡང་རྩ་བ་དེ་ལ་ཐུག་པ་རེད། སེམས་ཅན་ཐམས་ཅད་རླུང་གི་རང་བཞིན་དུ་གནས་པའི་ནང་། སེམས་ཅན་ཐམས་ཅད་རླུང་གི་རང་བཞིན་རེད་མ་དག་པའི་སྐབས་སུ་ཡང་རླུང་དེ་ལ་བརྟེན་ནས་བྱུང་བ་རེད། རླུང་ཡོད་ན་སེམས་ཅན་ཡོད། རླུང་མེད་ན་སེམས་ཅན་མེད། ད་རླུང་འདི་འགྲོ་སྟངས་འགྱུར་སོང་ན་གདོན་དང་གེགས་གནོད་པ་ལ་སོགས་པའི་གེགས་སྣ་ཚོགས་བྱུང་བར་གསུངས་ཏེ། རླུང་ཞེས་བྱ་བ་ལས་ཀུན་བྱེད། །ཅེས་པས་མ་དག་འཁོར་བའི་བྱ་བ་སྣ་ཚོགས། དག་པ་ཡེ་ཤེས་ཀྱི་བྱ་བ་སྣ་ཚོགས་ཐམས་ཅན་རླུང་གི་བྱེད་ལས་བརྟེན་ནས་བྱུང་བ་རེད། །ད་རླུང་བསྒོམ་ཤིན་ཏུ་གནད་ཆེ་བ་ཡིན་ནོ། །
ད་རླུང་བསྒོམ་ཚུལ་འདྲ་མི་འདྲ་མང་པོ་ཡོད་རེད། འཇམ་པའི་རླུང་དང་། རྩུབ་པའི་རླུང་ལ་སོགས་པའི་ཐ་སྙད་མང་པོ་ཡོད་རེད། རླུང་ཆེན་པོ་བསྒོམ་ཡ་མི་དམངས་ལ་བཤད་ཤེས་ས་མ་རེད། རྗེས་མ་ག་ལེ་ག་ལེ་ལྟ་རོགས་བྱོས། ཡིན་ན་ཡང་དེ་ལ་ངེད་འཇམ་རླུང་གཅིག་ཏོག་ཙམ་བཤད་བཞག་གི་ཡིན། རླུང་འདི་ཉིད་བསྒོམ་པ་ནི། ལུས་ཀྱི་གནད་གོང་ལྟར་བྱས་ནས། དང་པོར་རླུང་ཐེངས་གསུམ་ཕྱིར་བུས་པས། གཟུང་བ་དང་འཛིན་པ་ནད་དང་གནོད་པ་ལ་སོགས་པ་ཐམས་ཅད་ཕྱིར་སངས་ཀྱིས་སོང་བར་བསམ་ཞིང༌། དེ་ནས་རླུང་བཟུང་སྟེ། རླུང་གའུ་ཁ་སྦྱོར་དུ་བྱ་ཞིང་འཛིན་པའི་དུས་སུ་མཆིལ་མ་ཞིག་མིད་པ་དང་དུས་མཉམ་པོར་རླུང་བཟུང་ནས་ཡུན་རིང་དུ་བསྒོམ་དགོས་པ་ཡིན་ཏེ། དེ་ལྟར་སྒྱུ་མ་ཆེན་པོ་ལས། སྲོག་དང་རྩོལ་བ་འབད་ནས་སུ། །རྣལ་འབྱོར་པས་ནི་དབུགས་རྔུབས་བྱ། ཞེས་གསུངས་པས། རླུང་བཟུང་ཞིང་། ད་རླུང་དེ་དུས་རྒྱུན་དུ་རླུང་འདི་སྟོད་ལ་ཡར་རྒྱུགས་སྡོད་པ། སེམས་འདི་མགོ་ལ་ཡར་ཡོད་སྡོད་པའི་སྣང་བ་། རླུང་གི་གནས་འདི་ལུས་ཀྱི་ལྟེ་བའི་མཐིལ་ཙམ་ལ་གཏད། རང་གི་གསུས་པ་འདི་ཅུང་ཟད་ཕར་ལྡིར་ཙམ་བྱོས། སེམས་འདི་ཡོད་སྙམ་སེམས་དང་རླུང་གཉིས་གཅིག་པ་རེད། དེ་ལ་གནས་ནས་ཡོད་བསམ། ད་དེ་ལ་འབྱམས་རླུང་ཟེར། ཉོན་མོངས་པ་ཞི་བ་དགེ་བའི་བློ་ཐམས་ཅད་སྐྱེས་པ་ལུས་ལ་ནད་སྣ་ཚོགས་པ་མི་འབྱུང་བ་དེ་འདྲའི་ཕན་ཡོན་ཆེན་པོ་ཡོད་རེད། འདིར་ཉུང་ཉུང་བཤད་ཡོད། རླུང་གའུ་ཁ་སྦྱོར་གསུང་པ་རེད། ཁྱོད་རང་ཚོས་སྐུ་གསུམ་ངོ་སྤྲོད་ཉམས་སུ་ལེན་ཚར་ན་མཚམས་ལ་སྡོད་བླ་མའི་སྐུ་མདུན་ནས་བསླབ། དེ་མ་གཏོགས་བཤད་ཤེས་ཀྱི་མ་རེད། རླུང་བཟུང་ཞིང་བླ་མའི་རྣལ་འབྱོར་དང་མ་བྲལ་བར་བརྩོན་འགྲུས་དྲག་པོས་བསྒོམ་པ་ཤིན་ཏུ་གནད་ཆེ་བ་ཡིན་ཏེ། རྗེ་བཙུན་ཆེན་པོ་ཏེ་ལོ་པའི་ཞལ་ནས། རླུང་གི་གནད་བཟུང་རིག་པ་གཅུན་ལ་བོར། །ལྟ་སྟངས་སེམས་འཛིན་ཡན་ལག་དུ་མ་ཡིས། །རིག་པ་ངང་ལ་མི་གནས་བར་དུ་གཅུན། །ཅེས་གསུངས་པ་ནང་བཞིན་ཆེན་པོ་གནས་ལུགས་ཀྱི་ངང་དུ་བསྒོམ་ནས་རླུང་གནས་ས་ལྟེ་བའི་འོག་ལ་གནས་ཡོད་བསམ་ནས་བསྒོམ་ཤོག་གསུངས། དེ་ལ་ལྟོས་ནས་ང་རང་ཚོ་འཇིག་རྟེན་པ་ལ་དཔེའི་དབང་དུ་བྱས་ན་ལུང་པ་ལ་རྒྱལ་ས་དེའི་མཐའ་ལ་གྲོང་གསེབ་གཅིག་ཡོད་པའི་དབང་དུ་བཏང་ན། རྒྱལ་ས་ལ་བདེ་བོ་བྱུང་། འཁྲུག་པ་མ་ཤོར། ཡར་རྒྱས་ཡག་པོ་ཡོད། སྐྱིད་པོ་ཡོད་ན་མཐའ་སྐོར་གྱི་ལུང་པ་ལ་ཡང་ཡར་རྒྱས་དང་སྐྱིད་པོ་ཡོང་གི་རེད། རྒྱལ་ས་ལ་འཁྲུག་པ་ཤོར། དཀའ་ལས་ཁག་པོ་རེད། ལས་ཀ་ལས་མ་ཐུབ་པ་རེད་ན་དེའི་མཐའ་སྐོར་དུ་ཡོད་པའི་ལུང་པ་ཡང་དེའི་ཆ་ལ་མྱང་འགྲོ་གི་རེད། དེ་ཡིན་དུས་རླུང་གི་རྒྱལ་ས་དེ་ལྟེ་བའི་ཐད་དུ་ཡོད་དེ་གཟུང་ཐུབ་ན་ཡན་ལག་གི་རླུང་ཐམས་ཅད་ཡག་པོ་རེད་འགྲོ་གི་ཡོད་རེད། ཞེས་གསུངས་པས་རླུང་བཟུང་ཞིང་རིག་པ་གསལ་སྟོང་འཛིན་མེད། འོད་གསལ་བའི་ངང་དུ་མ་གཡེང་པར་བཞག་ཅིང་། སེམས་ལ་འཛིན་པ་མེད་རྣམ་རྟོག་རང་སར་བཞག །གསལ་སྟོང་འཛིན་མེད་ངང་ལ་བཞག །ཡང་སེམས་ནག་འཐོམ་མེ་གཉིད་ཁུག་སོང་བ་ལྟ་བུ་མ་ཡིན་པ། འོད་གསལ་བ་གང་ཡང་བྱེད་ཐུབ་པ་རླུང་གཏོང་བའི་དུས་སུ་སྣ་བུག་ནས་དལ་གྱིས་བཏང་ཞིང༌། སྡིག་པ་དང་སྒྲིབ་པ་ཐམས་ཅད་དག་པར་བསམ་པ་ནི། དཔེར་ན་སྣོད་སྤྱད་ངན་པ་འཁྲུད་པ་དང་འདྲ་བས། གོང་དུ་བརྗོད་པ་དེ་བཞིན་དུ་གཟུང་འཛིན་ལ་སོགས་པ་ཐམས་ཅད་སངས་ཀྱིས་དག་པར་བསྒོམ་པ་ནི། སྲོག་རྩོལ་རླུང་གི་གནད་ཡིན་ནོ། །
ད་ནི་རྩོལ་བ་ལུས་སྦྱོང་གི་གནད་སྟོན་ཏེ། ལུས་ཀྱི་སྒྲིབ་པ་སྦྱོང་བར་བྱེད་པའི་ཆེད་དུ་ལུས་སྦྱོང་སུམ་ཅུ་རྩ་བདུན་པ་བྱེད་པ་ནི་འདི་ཀརྨ་པའི་ཁྱད་ཆོས་རེད་སྲོག་རྩོལ་རླུང་གི་གནད་རྫོགས་པར་བྱ་ཞིང༌། ད་དེ་ཡང་སང་ཉིན་རྗེས་མ་ཆོས་ཉམས་ལེན་བྱ་འདོད་ན་བླ་མའི་སྐུ་མདུན་ལ་སྡོད་ནས་ཞུས། མཚམས་ལ་སྡོད་ནས་མ་གཏོགས་དམངས་ལ་ངས་བཤད་ཤེས་ས་མ་རེད། ད་ལྟ་ལུང་འདོན་བཞག་ཡ་ཡིན། ལུས་ཀྱི་སྒྲིབ་པ་སྦྱོང་བར་བྱེད་པའི་ཆེད་དུ་ལུས་སྦྱོང་སུམ་ཅུ་རྩ་བདུན་པ་བྱེད་པ་ནི་སྲོག་རྩོལ། རླུང་གི་གནད་རྫོགས་པར་བྱ་ཞིང༌། དེའི་ངང་ལས་སྣ་བུག་གི་རླུང་ཐེངས་གསུམ་ཕྱིར་བུས་ཏེ། །དེ་ནས་རླུང་བཟུང་ནས་ལག་པ་གཉིས་ས་གནོན་གྱི་ཕྱག་རྒྱ་བྱས་ལ། གཡས་གཡོན་དུ་ཐེངས་གསུམ་གསུམ་བསྐོར་བས་དྲུག །དེ་ནས་པུས་མོ་གཡས་པ་ལ་འཇུས་ནས། གཡས་གཡོན་གཉིས་སུ་ཐེངས་གསུམ་བསྐོར་བས་བཅུ་གཉིས། ཡང་པུས་མོ་གཡོན་པ་ལ་འཇུས་ནས། གཡས་གཡོན་གཉིས་སུ་གསུམ་གསུམ་བསྐོར་བས་བཅོ་བརྒྱད། དེ་ནས་ལག་པའི་མཐེ་བོང་གིས་སྲིན་ལག་གི་རྩ་མནན་ཏེ། ཁུ་ཚུར་བཅངས་ནས་ཞགས་པ་འཕེན་པའི་སྟངས་གཡས་གཡོན་གྱིས་ལན་གསུམ་གསུམ་བྱས་པའི་ཉི་ཤུ་རྩ་བཞི། དེ་ནས་རྩལ་པོ་ཆེ་མདའ་འགེངས་པ་ལྟར། གཡས་གཡོན་དུ་ལན་གསུམ་གསུམ་བྱས་པས་སུམ་ཅུ་ཐམ་པ། དེ་ནས་རྩ་མདུད་གྲོལ་བར་བྱ་བའི་ཆེད་དུ། ལག་པའི་ནང་ཕྱོགས་གཉིས་ལ་ཡང་ཡར་བྱུག་མར་བྱུག་ལན་གསུམ་གསུམ་བྱས་པས་སུམ་ཅུ་རྩ་དྲུག །དེ་ནས་རླུང་རོ་བསལ་བར་བྱ་བའི་ཆེད་དུ། རོ་སྟོད་རྟ་འགྲེ་མོ་བྱས་ནས་སྤྲུག་པ་ལྟར་སི་ལི་ལི་སྤྲུག་པས་སུམ་ཅུ་རྩ་བདུན་ནོ། །དེ་ལྟར་བརྒྱའམ་ཅི་ནུས་ཀྱིས་སྟོང་ལ་སོགས་པ་བྱས་ནས་ཐང་ཆད་པའི་དུས་སུ་རིག་པ་གང་དུ་ཡང་མི་འཕྲོ་བར་སལ་ལེ་སིང་ངེ་བའི་ངང་ལ་མཉམ་པར་བཞག་ཅིང༌། དེ་ལྟར་དུ་དབང་པོ་རབ་ལུས་སྦྱོང་ཚར་གཅིག་གི་ནང་དུ། འཛིན་སེམས་དྭངས་ཤིང་ཆོས་ཐམས་ཅད་ཆོས་ཀྱི་སྐུར་ཤེས་པ་དང༌། དབང་པོ་འབྲིང་ཟླ་བ་དྲུག་གམ། ལོ་དྲུག་ལ་སོགས་པས་ཆོས་ཀྱི་སྐུ་རྟོགས་པ་དང༌། དབང་པོ་ཐ་མ་ཡང་མི་ཚེ་གཅིག་གིས་སངས་རྒྱས་པར་གསུངས་ཏེ། དེ་ཡང་ནཱ་རོ་པའི་ཞལ་ནས། ཟླ་དྲུག་བསྒོམས་པས་རླུང་དྲུག་ཟིན། །གྲངས་མེད་གསུམ་གྱི་ས་ལམ་དེ། །སྐད་ཅིག་སུམ་ཅུ་རྩ་བདུན་ལ། །དེ་ཉིད་རྟོགས་པའི་ཡེ་ཤེས་རྙེད། །ཅེས་གསུངས་པས། །མཚན་ཉིད་པས་བསྐལ་པ་གྲངས་མེད་པ་གསུམ་དུ་ཚོགས་བསགས་ནས་སངས་རྒྱས་འདོད་པ་ལ། འདིར་སྐད་ཅིག་མ་སུམ་ཅུ་རྩ་བདུན་ལ་སངས་རྒྱས་པར་འདོད་པ་ཡིན་པས་ལུས་སྦྱོང་བྱ་ཞིང༌། ཕྱག་རྒྱ་ཆེན་པོ་རྒྱུན་ཆད་མེད་པར་བསྒོམ་པར་བྱ། དེ་ནི་རྩོལ་བ་ལུས་སྦྱོང་གི་གནད་དོ། །ད་ང་ཚོས་ཐུན་མོང་གི་མདོ་རྣམས་ཀྱི་ནང་དུ་དྲན་པ་ཉེར་བཞག་བཞི་ལ་སོགས་པ་བྱང་ཆུབ་ཀྱི་ཆོས་སུམ་ཅུ་རྩ་བདུན་པོ་དེ་དེའི་སྐབས་སུ་ལུས་སྦྱོང་གི་ཆོས་གནད་ནང་འཐུས་ཡོད་རེད།
ད་ནི་གནད་བཞི་བསྒོམ་པར་བྱ་བའི་རྩ་བ་གཏུམ་མོ་ཡིན་ཏེ། གཏུམ་མོ་ཞེས་པའི་ནི་དྲག་ཏུ་ཁྲོས་པ་ཞེ་སྡང་ངང་ནས་ཁྲོས་པ། ཁྲོས་ནས་ལས་ཀ་ལས་པ། ཁྲོས་ནས་མགྱོགས་པོ་མགྱོགས་པོ་མེད་བཟོ་འགྲོ་གི་རེད། གཏུམ་མོ་བསྒོམ་ནས་མ་དག་པ་མགྱོགས་པོ་མགྱོགས་པོ་བཅོམ་འགྲོ་གི་རེད་གསུངས། གནད་གཞི་དང་སྔོན་འགྲོ་ལ་སོགས་སྔོན་དུ་སོང་ནས། ད་ནི་གཏུམ་མོ་ཉམས་སུ་བླང་སྟེ། དེ་ཡང་བསྒོམ་པའི་དུས་སུ། དང་པོར་བཅའ་བ་ལུས་ཀྱི་གནད་བྱ་སྟེ། བླ་མའི་རྣལ་འབྱོར་བསྒོམས་ནས། བྱང་ཆུབ་མཆོག་ཏུ་སེམས་བསྐྱེད་ཅིང༌། ཆོས་ཐམས་ཅད་མི་དམིགས་པའི་ངང་ལ་མཉམ་པར་བཞག་གོ །དེའི་ངང་ལས་པདྨ་དང་ཉི་མ་ཟླ་བའི་གདན་གྱི་སྟེང་དུ་བདག་ཉིད་ཀྱི་རྣམ་པར་ཤེས་པ་ཡི་གེ་བམ་ཞིག་བསྒོམ་ཞིང༌། དེ་ཡོངས་སུ་གྱུར་པ་ལས། རྗེ་བཙུན་མ་རྡོ་རྗེ་རྣལ་འབྱོར་མ་ཞལ་གཅིག་ཕྱག་གཉིས་པ་མཆེ་བ་བཞི་གཙིགས་པ། དབུ་སྐྲ་སིལ་བུར་ཡོད་པ། རུས་པའི་རྒྱན་ཆ་ལྔས་བརྒྱན་པ་དེ་ལྟ་བུའི་ཤར་དུ་རྡོ་རྗེ་མཁའ་འགྲོ་སྔོན་མོ། ལྷོར་རིན་ཆེན་མཁའ་འགྲོ་སེར་མོ། ནུབ་ཏུ་པདྨ་མཁའ་འགྲོ་དམར་མོ། བྱང་དུ་ལས་ཀྱི་མཁའ་འགྲོ་ལྗང་ཁུ་བསྐྱེད་ལ། དེ་ལྟར་དུ་བསྒོམས་པའི་ལྟེ་བར་ཡི་གེ་རམ་ཡོངས་སུ་གྱུར་པ་ལས། ཡེ་ཤེས་ཀྱི་མེ་མཚན་ཉིད་བཞི་ལྡན་ཅིག་བསྒོམས་ནས། མེ་དེ་ཇེ་ཆེར་སོང་བས་དབུ་མའི་ནང་དང༌། རོ་རྐྱང་གཉིས་ཀྱི་རྩའི་ནང་དུ་སོང་བས་ལུས་ཐམས་ཅད་ཡེ་ཤེས་ཀྱི་མེར་གྱུར་བར་བསྒོམ་ཞིང་ཡུན་རིང་དུ་སྐེད་པ་གཡས་བསྐོར་གཡོན་བསྐོར་དུ་བྱ་ཞིང་བསྒོམས་པས་དྲོད་ཆེན་པོ་རབ་ཞག་ཅིག །འབྲིང་གསུམ། ཐ་མ་ཡང་ཞག་བདུན་ན་སྐྱེ་ཞིང༌། ཅི་ལྟར་ཐ་མར་གྱུར་ནའང་ཞག་ཉི་ཤུ་རྩ་གཅིག་གིས་དྲོད་སྐྱེ་བ་ཡིན་ནོ། །བསྒོམ་པའི་དུས་སུ་རྔུལ་ན་དྲོད་མི་སྐྱེ་བས། རྔུལ་སྐེམས་པའི་གདམས་ངག་ནི། གོང་དུ་བཤད་པ་བཞིན་ལུས་སྦྱོང་སུམ་ཅུ་རྩ་བདུན་པ་བྱ་ཞིང་བསྒོམ་མོ། །དེས་ནི་དྲོད་སྐྱེ་བ་མྱུར་ཞིང་རྔུལ་སྐེམས་སོ། །དེ་ནི་ཉམས་སུ་བླང་བའི་མཐིལ་པོ་གཏུམ་མོ་ཡིན་ནོ། །རང་ཉིད་རྡོ་རྗེ་འཕགས་མོ་ལ་བསྒོམ། ཤར་དུ་རྡོ་རྗེ་མཁའ་འགྲོ། ལྷོར་རིན་ཆེན་མཁའ་འགྲོ། ནུབ་ཏུ་པདྨ་མཁའ་འགྲོ། བྱང་དུ་ལས་ཀྱི་མཁའ་འགྲོ་བཅས་ཕྱོགས་བཞིར་བསྒོམ། དེ་ལྟར་དུ་བསྒོམས་པའི་ལྟེ་བར་ཡི་གེ་རམ་མེའམ་འོད་ཀྱི་རང་བཞིན་ལ་བསྒོམ། དེ་ལས་འོད་མེ་འདྲ་བ་ཞིག་རྩ་ཐམས་ཅད་ཀྱི་ནང་དུ་རྒྱུགས་ནས་རྩ་ཐམས་ཅད་མེས་གང་མ་དག་པ་ཐམས་ཅད་མེད་པར་བཟོས། རླུང་གི་དྭངས་མ་ཐམས་ཅད་ཡར་སྐྱེས་ཡོང་གི་རེད་བ། ད་འདི་རིང་ཆོས་ཐུན་དེ་ཙམ་ཡིན།
མཇུག་ཏུ་རིན་པོ་ཆེ་ནས། ད་རེས་ཁྱེད་རྣམ་པ་ལ་ཞུ་ཡ་གཅིག་བོད་ལ་ས་ཡོམ་ཆེན་པོ་རྒྱུགས་ནས་མི་མང་པོ་ཞེ་དྲག་བསད་ཡོད་རེད་སྡུག་བསྔལ་ཆེན་པོ་བྱུང་ཡོད་རེད། ཁ་ཤས་ཨ་པ་ཨ་མ་ཤི་ཕྲུ་གུ་ལུས། ཁ་ཤས་ཕྲུ་གུ་ཤི་ཨ་པ་ཨ་མ་སྡུག་བསྔལ་མྱང་ནས་བསྡོད། ཁ་ཤས་རྐང་ལག་ལ་སྐྱོན་དང་ནད་པ་བཟོས། ཁ་ཤ་གཟུགས་པོ་ལ་སྐྱོན་ཆེན་པོ་བཏང་ནས་སྡུག་བསྔལ་ཆེན་པོ་བྱུང་ཡོད་རེད། དེ་བཞིན་ཨ་མི་རི་ཀའི་ནང་མེ་འབར་ནས་གྲོང་ཚོ་མང་པོ་མེས་འཚིག་པ་དེ་འདྲ་འབྱུང་རེད། མེ་འདི་ཡིས་སེམས་ཅན་དུད་འགྲོ་མང་པོ་བསད་འདུག བྱ་བྱིའུ་དེ་འདྲ་མང་པོ་མེས་འཚིག རི་བོང་ལ་སོགས་རི་དྭགས་དང་འབུ་སྲིན་དཔེ་མེད་མང་པོ་མེས་འཚིག་ནས་སྡུག་བསྔལ་ཆེན་པོ་བྱུང་ཡོད་ས་རེད། ད་ཡང་ཨུ་རུ་སུ་དང་ཡུཀ་ཀེརན་གྱི་དམག་ཡུན་རིང་པོ་སོང་ནས་དེའི་དོན་ལ་མི་མང་པོ་བསད་སོང་བ་རེད། དོན་དག་གང་ཡང་མེད་པའི་སྡུག་བསྔལ་རེད། དོན་དག་མེད་པའི་ལས་ཀ་རེད། དམག་རྒྱབ་དུས་དུད་འགྲོ་མང་པོ་བསད། བྱ་བྱིའུ་དེ་འདྲ་རི་དྭགས་མང་པོ་བསད་ཡོད་ས་རེད། འཛམ་གླིང་གཞན་དག་ལ་མེད་པའི་སེམས་ཅན་མང་པོ་ཡུཀ་ཀེརན་ལ་ཡོད་རེད་ཟེར། དེ་འདྲ་མང་པོ་བསད་ཡོད་ས་རེད། ཡང་འཛམ་བུ་གླིང་གི་ཡུལ་ཕྱོགས་གང་སར་སྔར་མ་གྲགས་པའི་ནད་ཡམས་ཁྱད་མཚར་དེ་འདྲ་བྱུང་ནས་ཐོག་རྒྱག་ཏུ་མི་མང་པོ་ཤི་འདུག དེ་བཞིན་ཆུའི་འཇིག་པ་རླུང་གི་འཇིག་པ། ས་ཡི་འཇིག་པ་ཡིན་ན་ཡང་ག་བ་ག་སར་བྱུང་སྡོད་ཡོད་རེད། འཇིག་པ་ཆེན་པོ་མང་པོ་འཕྲོད་ཡོང་གི་འདུག དེ་དག་གི་ཆེད་དུ་ལྟུང་བཤགས་དང་བཟང་སྤྱོད་སྨོན་ལམ་སྤྱོད་འཇུག་སྨོན་ལམ་གསུང་རོགས་གནང་། ནད་པ་ཚོའི་ཆེད་དུ་སངས་རྒྱས་སྨན་བླའི་གཟུངས་དང་སྒྲོལ་མ་གསུང་རོགས་ཞུ།
སྒྲ་ཕབ་པ་བསོད་ནམས་སྟོབས་རྒྱལ།
