གང་གི་ཐུགས་རྗེའི་འོད་ཟེར་འཇིག་རྟེན་ཀུན་ཏུ་ཁྱབ་པ། སྒྲུབ་བརྒྱུད་བསྟན་པའི་སྲོག་ཤིང་༧དཔལ་རྒྱལ་དབང་ཀརྨ་ཨོ་རྒྱན་འཕྲིན་ལས་རྡོ་རྗེ་མཆོག་གི་ཟག་མེད་ཐུགས་ཀྱི་དགོངས་བཞེད་གཞིར་བཟུང་། སྙིགས་དུས་ཀྱི་འགྲོ་བའི་སྡུག་བསྔལ་སེལ་བའི་སླད་དུ། ལོ་ལྟར་གནས་མཆོག་རྡོ་རྗེ་གདན་དུ་རྒྱལ་ཡོངས་བཀའ་བརྒྱུད་སྨོན་ལམ་ཆེན་མོ་ཚོགས་པ་དང་སྟབས་བསྟུན་སྨན་སྦྱིན་སྨན་བཅོས་གནང་བའི་སྲོལ་བཟང་ཡོད་པ་ལྟར།
འདི་ལོར་ཡང་གདན་ས་དཔལ་སྤུངས་ཤེས་རབ་གླིང་བོད་ཀྱི་སྲོལ་རྒྱུན་གསོ་རིག་མཐོ་སློབ་ཆེན་མོའི་འགན་འཛིན་སྨན་རྩིས་པ་ཨེ་པ་བསོད་རིན་ཆེན་མཆོག་གི་གཙོས་པའི་ཨེམ་ཆི་བཞི་དང་རྡ་ས་ནོར་གླིང་ཁྱུང་གསར་ཨེམ་ཆི་སྐྱིད་ཆོས་ལགས། དེ་བཞིན་གདན་ས་དཔལ་སྤུང་ཤེས་རབ་གླིང་བོད་ཀྱི་སྲོལ་རྒྱུན་གསོ་རིག་སློབ་མཐར་ཕྱིན་པའི་སྨན་པ་བཅུ་གཉིས། འཇམ་དཔྱད་ཆེད་ལས་པ་སྨན་པ་ཆོས་དཔལ་རྒྱ་མཚོ་བཅས་ཁྱོན་སྡོམ་ཞབས་ཞུ་བ་མི་གྲངས་ཉི་ཤུ་ལྷག་གིས་སྔར་ལོ་བཞིན། ས་ཆ་འདྲ་མིན་ནས་ཕེབས་པའི་སྐྱ་སེར་རིས་མེད་དང་། ཕྱིའི་རྒྱལ་ཁབ་ནས་ཕེབས་པའི་དད་ལྡན་རྣམ་པ། ཁྱད་པར་ས་གནས་ཉམ་ཐག་ནད་ཅན་རྣམས་ལ་སྨན་སྦྱིན་བྱས་ཡོད།
ད་ཐེངས་ཀྱི་སྨན་བཅོས་ཞབས་ཞུའི་ཁོངས། ནད་གཞི་བརྟག་དཔྱད་དང་སྨན་སྦྱིན་ཕུད། དཔྱད་བཅོས་ཁོངས། མནན་མཉེ་དང་། འབྱར་བྱུགས་དུགས་སོགས་བོད་ཀྱི་སྲོལ་རྒྱུན་སྨན་དཔྱད་ཀྱི་ལག་ལེན་ཁག །ཤ་རུས་རྩ་ཡི་ནད་ལ་བཅོས་སྒྲིག་ Tuina 推拿治疗་གི་དཔྱད་དང་། སྐམ་ཁབ་ Acupuncture 针灸ཀྱི་དཔྱད་བཅོས་ཁག་ཀྱང་རིན་མེད་སྨན་བཅོས་ཞབས་ཞུ་ཕུལ་ཡོད་པ་དང་། ཞབས་ཞུའི་དུས་ཡུན་ཡང་སྤྱི་ཟླ་ ༢ པའི་སྤྱི་ཚེས་ ༥ ནས་ ༡༡ བར་གནང་ཡོད།
འདི་ལོ་ནད་པ་ཡོངས་སྡོམ་གཅིག་སྟོང་ལྔ་བཅུ་ལྷག་ཙམ་ལ་སྨན་སྦྱིན་དངསྨན་བཅོས་ཞབས་ཞུ་ལེགས་པར་གནང་བ་དང་། དམིགས་བསལ་འཇམ་དཔྱད་འབྱར་བྱུག་སོགས་གདན་ས་དཔལ་སྤུང་ཤེས་རབ་གླིང་སྲོལ་རྒྱུན་གསོ་རིག་མཐོ་སློབ་ངོས་ནས་རིན་མེད་གནང་བ་ཡིན་པར་གསུང་སོང་། དེའི་ཆེད་ནད་པ་ཡོངས་སྡོམ་༣༥༠ ཙམ་ནས་འཇམ་དཔྱད་སྨན་བཅོས་བསྟེན་གནང་འདུག །ནད་པ་མང་པོ་ཞིག་གིས་ཧ་ཅང་ཕན་ཐོགས་ཆེན་པོ་བྱུང་ཡོད་ཚུལ་བརྗོད་ཀྱི་འདུག་ལ། ལྷག་པར་མི་མང་འདུ་འཛོམས་ཆེ་སར་ཆམ་རིམས་སོགས་འགོ་སླ་བས་སྔོན་འགོག་དང་འཕྲོད་བསྟེན་ལམ་སྟོན་སོགས་ཧ་ལས་པ་གནང་ཡོད་པ་དང་། ཁོང་རྣམ་པའི་ལྷག་བསམ་དང་བྱམས་བརྩེའི་ངང་ནས་སྨན་དཔྱད་གནང་བས། ཡུན་རིང་ནད་ཀྱིས་མནར་བའི་ནད་པ་ཁ་ཤས་ལ་ཁ་ཡོད་ལག་ཡོད་ཕན་ཐོགས་ཆེན་པོ་བྱུང་ནས་དགའ་བའི་མཆི་མ་ཟག་པའང་མཇལ་ཡུལ་དུ་བྱུང་།
དེ་ལྟར་སྨན་པ་རྣམས་ཀྱི་ལྷག་བསམ་རྣམ་དག་གི་ཞབས་ཞུ་དང་། བཀའ་བརྒྱུད་སྨོན་ལམ་ཚོགས་པའི་མཐུན་འགྱུར་རོགས་རམ། དེ་བཞིན་ནད་པ་རྣམས་ཀྱི་ཡིད་ཆེས་གཡོ་མེད་བཅས་ཀྱི་མཐུ་ལས། འདི་ལོའི་སྨན་སྦྱིན་གྱི་མཛད་རིམ་ཡོངས་སུ་ལེགས་གྲུབ་བྱུང་བ་འདིས། རྒྱལ་བསྟན་ཕྱོགས་མཐར་དར་ཞིང་། འགྲོ་ཀུན་བདེ་སྐྱིད་ཀྱི་དཔལ་ལ་སྤྱོད་པའི་རྒྱུར་གྱུར་ཅིག །སརྦ་མངྒ་ལཾ།། བཀའ་བརྒྱུད་སྨོན་ལམ་གནས་ཚུལ་ཕྱོགས་བསྡུས་པ་ཀརྨ་བསོ་རྒྱས་པས། ༡༡/༠༢/༢༠༢༥
