ཆོས་ཉིད་མཉམ་པ་ཉིད་ལས་མ་གཡོས་ཀྱང་། །
ཐུགས་རྗེས་གཏན་དུ་མྱ་ངན་མི་འདའ་ཞིང་། །
འཕྲིན་ལས་རྣམ་བཞིས་འགྲོ་བའི་དོན་མཛད་པའི། །
བཅོམ་ལྡན་མི་འཁྲུགས་པ་ལ་ཕྱག་འཚལ་ལོ།།
ཞེས་སྒོ་གསུམ་རབ་གུས་དྭངས་བས་ཀ་དག་ཆོས་ཉིད་ལས་མ་གཡོས་བར་ཕྲིན་ལས་བཞི་ཡིས་འགྲོ་བའི་དོན་མཛད་པ་ལ་རྩལ་བརྙེས་ཤིང་མཆོག་ཏུ་བསྔགས་པ་དཔལ་བཅོམ་ལྡན་འདས་མགོན་པོ་མི་འཁྲུགས་པ་ལ་མཆོད་བརྗོད་སྔོན་དུ་བཏང་ནས།
དེ་ཡང་ལོ་ལྟར་བཀའ་བརྒྱུད་སྨོན་ལམ་ཆེན་མོའི་གཞལ་མེད་ཀྱི་རྣམ་དཀར་ཚོགས་ཆེན་གྱི་སྐལ་བཟང་གི་སྐབས་དང་བསྟུན་ནས། དུས་གསུམ་སངས་རྒྱས་ཀུན་གྱི་ཐུགས་བཅུད། ཕྲིན་ལས་ཀྱི་བྱེད་པོ། མངའ་བདག་ཡབ་སྲས་རྣམས་དང་ཐུགས་རྒྱུད་གཉིས་སུ་མེད་པ། སྒྲུབ་བརྒྱུད་བསྟན་པའི་སྲོག་ཤིང་༧དཔལ་རྒྱལ་བ་སངས་རྒྱས་ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཆོག་གི་ཐུགས་བརྩེ་ཆེན་པོའི་བཀའ་དགོངས་བཞིན་དུ་གཤིན་པོ་ཚེ་ལས་འདས་པ་རྣམས་ལས་ངན་སྡིག་ལྟུང་ཐམས་ཅད་དག་པར་སྦྱངས་ཏེ། རིམ་བཞིན་གཏན་བདེ་བླ་ན་མེད་པའི་གོ་འཕང་རྣམ་མཁྱེན་རྒྱལ་བའི་དཀྱིལ་འཁོར་ལ་འཇུག་པའི་ཆེད་དུ་དམིགས་ཏེ། ཉིན་ཤས་ཀྱི་རིང་ལ་བཅོམ་ལྡན་འདས་མགོན་པོ་མི་འཁྲུགས་པ་བསྒྲུབས་ནས་སྨོན་ལམ་གྱི་ཉིན་མཐའ་མར་བྱང་ཆོག་སྤར་སྲོལ་ཡོད་པ་ལྟར།
འདི་ལོའི་བཀའ་བརྒྱུད་སྨོན་ལམ་ཆེན་མོ་ཐེངས་སོ་དགུ་པ་ལ་ཡང་མཆོག་སྤྲུལ་ཨ་འཛིན་རིན་པོ་ཆེ་དང་སྤྲུལ་སྐུ་རིན་འབྱུང་རྣམ་གཉིས་གཙོས་པའི་བཅོམ་ལྡན་མགོན་པོ་མི་འཁྲུགས་པའི་ཆོ་གའི་བསྙེན་སྒྲུབ་ལེགས་པར་མཐར་ཕྱིན་པའི་སྒྲུབ་བླ་བཞི་བཅུ་ལྷག་གིས་ལས་སྒྲིབ་བག་ཆགས་ཐམས་ཅད་སྦྱོང་བ་ལ་མཆོག་ཏུ་བསྔགས་པ་དཔལ་བཅོམ་ལྡན་མགོན་པོ་མི་འཁྲུགས་པའི་ཆོ་གའི་སྒོ་ནས། སྤྱིར་ལྷག་བསམ་གངས་རི་ལྟར་དཀར་ཞིང་། དད་གུས་རྡོ་རྗེ་བཞིན་དུ་བརྟན་པའི་བཀའ་བརྒྱུད་སྨོན་ལམ་དང་འབྲེལ་ཐོགས་ཀྱི་གཏོང་ཕོད་ཅན་གྱི་སྦྱིན་པའི་བདག་པོ་རྣམས་ཀྱི་ཐོག་དྲངས་འགྲོ་བ་སེམས་ཅན་ཀུན་གྱི་སྡིག་ལྟུང་མ་ལུས་པ་སྦྱོང་ཞིང་ལུགས་གཉིས་ཀྱི་བསམ་པའི་འདོན་དོན་དང་བྱ་བཞག་ཐམས་ཅད་གེགས་མེད་བདེ་བླག་ཏུ་འགྲུབ་པ་དང་། བྱེ་བྲག་ཏུ་འཇིག་རྟེན་འདི་ནས་ཕྱི་མའི་ལྔ་ལམ་དུ་གྱུར་པའི་གཤིན་པོ་རྣམས་ཡ་ང་བའི་བར་དོའི་འཁྲུལ་སྣང་འཇིགས་སྐྲག་དང་ངན་སོང་གི་སྡུག་བསྔལ་ལས་མྱུར་དུ་ཐར་ནས་སྐྱེ་བ་དང་ཚེ་རབས་ཀུན་ཏུ་སྟོན་པ་དང་བསྟན་པའི་རྗེས་སུ་འཛིན་པའི་སླད་དུ་ཐུགས་བསྐྱེད་སྨོན་ལམ་དམིགས་རིམ་ཟབ་རྒྱས་ཀྱི་སྒོ་ནས་གཏེར་སྒར་དགོན་གྱི་གཙུག་ལག་ཁང་གི་མདུན་ཕྱོགས་སུ་བྱང་ཆོག་སྤར་གནང་བཞིན་པའི་སྣང་བརྙན་ལགས་སོ། །
མཐར། དེ་ཡང་ཇི་སྐད་དུ།
བདག་ཅག་དེང་ནས་སྐྱེ་བ་ཐམས་ཅད་དུ། །
ཕ་རོལ་ཕྱིན་བཅུའི་དཔལ་ལ་ལོངས་སྤྱོོད་ཅིང་། །
རྣམ་གསུམ་སྒྲིབ་པའི་ཚོགས་རྣམས་དྲུང་ཕྱུང་ནས། །
མི་འཁྲུགས་མགོན་པོའི་གོ་འཕང་ཐོབ་པར་ཤོག །
ཅེས་གསུང་པ་དེ་དེ་བཞིན་དུ་འགྲུབ་པར་ཤོག །
སྤྱི་ལོ་༢༠༢༥/༢/༡༡ ཉིན་ལ་བཀའ་བརྒྱུད་སྨོན་ལམ་ཆེན་མོའི་གནས་ཚུལ་ཕྱོགས་བསྡུས་པ་ཕྲན་རྒྱལ་ལོ་བཀྲ་ཤིས་ནས་རགས་བསྡུས་སུ་བྲིས་པ་དགེའོ།
