ཁོང་ནི་ཕྱི་ལོ་ ༡༩༣༩ ལོར་བོད་ཤར་ཕྱོགས་ཁམས་རི་བོ་ཆེར་སྐུ་འཁྲུངས་པ་ནས་ཕྱིས་དུས་ཀྱི་འཕོ་འགྱུར་སྐབས་སུ་རྒྱ་གར་འཕགས་པའི་ཡུལ་དུ་ཕེབས་ཏེ། རྒྱལ་དབང་རིག་པའི་རྡོ་རྗེའི་བཀའ་དགོངས་ལྟར་དབྱིན་ཡུལ་ལ་ཕེབས། སྤྱི་ལོ་ ༡༩༦༧ ལོར་དབྱིན་ཡུལ་བསམ་ཡས་གླིང་དུ་བསམ་ཡས་གླིང་བོད་པའི་ཆོས་ཚོགས་ཞེས་པ་གསར་དུ་བསྐྲུན་ཏེ་བོད་བརྒྱུད་ནང་བསྟན་སྤྱི་དང་། བྱེ་བྲག་ཏུ་བཀའ་བརྒྱད་པའི་བསྟན་པ་རྒྱ་ཆེར་དར་སྤེལ་གནང་། དེ་ཙམ་མ་ཟད་རྒྱལ་སྤྱིའི་རོགས་པ་ཚོགས་པ་གསར་འཛུགས་གནང་ཏེ། བོད་ནང་དང་། ཨ་ཧྥི་རི་ཀ།།བལ་ཡུལ་གཙོས་པའི་ཡུལ་གྲུ་མང་པོ་ཞིག་ལ་དྭ་ཕྲུག་སློབ་གྲྭ་མང་པོ་གསར་འཛུགས་གནང་ཏེ། ཉམས་ཐག་པའི་དྭ་ཕྲུག་མང་པོ་ཞིག་ལ་དེང་དུས་ཀྱི་ཤེས་ཡོན་སྦྱོང་བའི་གོ་སྐབས་དང་ལྷན་དུ་བོད་བརྒྱུད་ནང་བསྟན་ལ་ཡང་གོ་རྟོགས་ཡོད་པ་མཛད་པའི་སྒོ་ནས། དྲིན་ཆེན་ཕ་མ་མེད་པའི་དྭ་ཕྲུག་དུ་མ་ཞིག་ལ་ཤེས་རབ་ཀྱི་མིག་དང་ལྡན་པའི་འོད་སྟོང་འཕྲོས་པའི་མདུན་ལམ་གསར་པ་ཞིག་སྟེར་གནང་ཡོད། དེ་བཞིན་དུ་དམ་པ་ཁོང་གིས་༧རྒྱལ་མཆོག་བཅུ་བདུན་པ་ཆེན་པོ་སྤྲུལ་པའི་ཡང་སྲིད་བཙལ་དཔྱད་སྐབས་སུ་ཡང་སྐུ་ངལ་མཛད་མེད་གནང་ཡོད་པ་མ་ཟད། དུས་རྟག་ཏུ་རྒྱལ་དབང་ཀརྨ་པ་བཅུ་བདུན་པ་མཆོག་ལ་དད་གུས་དང་དམ་ཚིག་ལྡན་པའི་སྒོ་ནས་བཀའ་བཞིན་སྒྲུབ་མཁན་ཞིག་སྟབས། དམ་པ་ཁོང་གི་སྐུ་གཤེགས་པའི་རྗེས་དྲན་དང་འཁྲུལ་མེད་ཡང་སྲིད་རིན་པོ་མྱུར་དུ་འབྱོན་པའི་སླད་དུ་དམིགས་ཏེ། ༧དཔལ་རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཆོག་གི་གསང་གསུམ་ཕྲིན་ལས་ཀྱི་ཆ་ཤས། རླབས་ཆེན་གྱི་དགོངས་བཞེད་དང་བླ་ན་མེད་པའི་དབུ་ཁྲིད་འོག་ནས། གཟུར་གནས་རིས་མེད་དམ་པ་ཀུན་གྱིས་ཡི་རང་གི་མཆོད་པའི་མེ་ཏོག་འབུལ་ཡུལ་དུ་གྱུར་པའི་རྒྱལ་ཡོངས་བཀའ་བརྒྱུད་སྨོན་ལམ་ཆེན་མོ་ཞེས་མཇལ་བ་ཙམ་གྱིས་གུས་པའི་མེ་ལྕེ་འབར། དད་པའི་མིག་ཆུ་ཤོར་སའི་བསོད་ནམས་ཀྱི་ཞིང་མཆོག་ཏུ་གྱུར་པ་ལ། སྲི་ཞུ་ཞབས་ཏོག་གི་རྒྱུ་རུ་འགྲོ་བ་དང་། བཀའ་བརྒྱུད་པའི་བསྟན་པའི་སྲོག་ཤིང་རྒྱལ་བ་ཡབ་སྲས་རྣམས་སྐུ་མི་འགྱུར་རྡོ་རྗེའི་རང་ཁམས་བརྟན་པ་དང་ཕྲིན་ལས་རྒྱུན་ཆད་མེད་པར་བརྒྱུད་པའི་དོན་དུ་སྨིན་ནས། སྤྱི་ལོ་ ༢༠༡༤ ལོར་དབུ་བཙུགས་ཏེ། ལོ་ལྟར་བཀའ་བརྒྱུད་སྨོན་ལམ་ཆེན་མོ་དང་སྟབས་བསྟུན་ནས་བཀའ་བརྒྱུད་སྨོན་ལམ་ཆེན་མོའི་འགན་འཛིན་བླ་མ་ཆོས་གྲགས་དང་། དྲུང་ཆེ་བྱང་ཆུབ་ལགས་ཀྱིས་གོ་སྒྲིག་མཐུན་འགྱུར། དེ་བཞིན་དུ་གཏེར་སྒར་དགོན་གྱིས་རོགས་རམ་དང་། རྒྱ་གར་རྒྱལ་ཡོངས་ཀྱི་དགེ་འདུན་ཚོགས་པའི་(All India bhikkhu Sanga) འགན་འཛིན་སྐུ་ཞབས་ Bhikkhu Pragyadeep ལགས་ཀྱིས་ཐང་ཐབ་ཚང་ (soup kitchen) ལ་དགའ་སྤྲོ་ཆེན་པོས་ས་ཆ་གྲ་སྒྲིག་གནང་ཡོད་ལ། དེ་དང་ལྷན་དུ་འདི་ལོར་ཨ་ཀོང་རིན་པོ་ཆེ་དང་འབྲེལ་བ་དམ་ཟབ་ཡོད་པའི་སི་པེན་གྱི་རོགས་པ་ཐེབས་རྩ་ཚོགས་པས་དམ་པ་ཁོང་ལ་གུས་བཀུར་དང་ཆེ་བསྟོད་མཚོན་བྱེད་དུ་ཐང་ཐབ་ཁང་(Soup Kitchen) སྣེ་འཁྲིད་དང་གོ་སྒྲིག་གནང་སྟེ། གནས་མཆོག་རྡོ་རྗེ་གདན་ཉེ་འདེབས་སུ་གནས་པའི་བདག་མེད་དབུལ་ཕོངས་ཉམས་ཐག་ཆིག་སྟོང་ལྔ་བརྒྱ་ལྷག་ལ་ཉིན་བདུན་གྱི་རིང་ལ་ཉིན་དགུང་ཞལ་ལག་འབུལ་བཞིན་ཡོད་འདུག །ཏོག་དབྱིབས་ནད་ཡམས་རྗེས་སླར་ཡང་བཀའ་བརྒྱུད་སྨོན་ལམ་ཐེངས་སོ་བརྒྱད་པ་དང་བསྟུན་ནས་ཟས་སྦྱིན་ཐེངས་བཅུ་པ་དབུ་བཙུགས་ཐུབ་ཡོད་པ་བཞིན་དུ། འདིའི་ལོ་ཡང་རྒྱལ་ཡོངས་བཀའ་བརྒྱུད་སྨོན་ལམ་ཐེངས་སོ་དགུ་པ་དང་བསྟུན་ནས་ཉིན་བདུན་གྱི་ཟས་སྦྱིན་ཐེངས་བཅུ་གཅིག་པ་དབུ་བཙུགས་གནང་། སྐུ་མགྲོན་གཙོ་བོ་༧སྐྱབས་རྗེ་ཡོངས་དགེ་མི་འགྱུར་རིན་པོ་ཆེ་དང་། Bhikkhu Pragyadeep སོགས་ཕེབས་འདུག
༧སྐྱབས་རྗེ་ཡོངས་དགེ་མི་འགྱུར་རིན་པོ་ཆེ་མཆོག་གིས་དབུལ་པོ་རྣམས་རེ་རེ་བཞིན་དུ་ཚ་ལུ་མ་ལག་ཏུ་སྦྱིན་གནང། རིན་པོ་ཆེ་མཆོག་གིས་འགན་འཛིན་དང་། དང་བླངས་བ་ཚོགས་མི་རྣམས་ལ་བཀའ་མོལ་དང་ཐུགས་རྗེ་བཀའ་དྲིན་ཆེ་ཞེས་གསུང་སྟེ་ཕེབས་སོང།
༧སྐྱབས་རྗེ་ཨ་ཀོང་རིན་པོ་ཆེ་མཆོག་གི་ལྷག་བསམ་དང་སེམས་ཤུགས་ལ་བརྟེན་ནས། མི་མང་པོ་ཞིག་ལ་སེམས་ཤུགས་དང་མི་ཆོས་རིང་ལུགས་ཀྱི་རོགས་སྐྱོར་ལ་སྐུལ་འདེད་གཏོང་ཡོད་ལ། དམ་པ་ཁོང་བློ་གཏད་དད་མོས་ཅན་ཚོས་མི་ཆོས་རིང་ལུགས་ཀྱི་རོགས་རམ་གྱི་ལས་གཞི་སོགས་སྤེལ་བའི་སྒོ་ནས་དམ་པ་ཁོང་གི་མཛད་ཕྲིན་མུ་མཐུད་དུ་སྤེལ་ཏེ་རྒྱུན་སྐྱོང་གནང་བཞིན་ཡོད་ཅེས་གསུངས་སོང།
སླར་སྨྲས་པ།
སྒྲུབ་བརྒྱུད་རྒྱལ་བསྟན་སྤེལ་ལ་ལྷག་བསམ་བརྩེགས། །
མགོན་མེད་ཉམས་ཐག་སྐྱོང་ལ་བྱམས་བརྩེ་རྒྱས། །
སྐྱབས་རྗེ་ཨ་ཀོང་དམ་པ་རྗེས་དྲན་ཞིང་། །
གང་གི་དགྱེས་ཞལ་སླར་ཡང་འཆར་བར་ཤོག །
ཅེས་སྤྱི་ལོ་ ༢༠༢༥/༢/༩ ཉིན་ལ་བཀའ་བརྒྱུད་སྨོན་ལམ་ཆེན་མོའི་གནས་ཚུལ་ཕྱོགས་བསྡུས་པ་ཕྲན་རྒྱལ་ལོ་བཀྲ་ཤིས་ནས་བྲིས་པ་དགེའོ། །
